Ráslisti fyrir fimmganginn

Þá er ráslistinn klár fyrir fimmganginn en fyrstur í braut er Hinrik Bragason á Byr frá Borgarnesi en þeir eru orðnir nokkuð reyndir í þessari keppnisgrein. Keppnin hefst kl. 19:00 en hún fer fram í Samskipahöllinni í Spretti í Kópavogi. Húsið opnar 17:00 en boðið verður upp á ofnbakað lambalæri með gratíneruðum kartöflum, rjómalagaðri sveppasósu og fersku salati því er tilvalið að mæta snemma og fá sér að borða á undan.

Margt verður um gæðinginn í Samskipahöllinni þetta kvöldið en á listanum eru margir hátt dæmdir stóðhestar þ.á.m. Hrafn frá Efri - Rauðalæk en knapi á honum er Daníel Jónsson. Hrafn hefur hlotið 9,03 fyrir hæfileika og þar af 9.5 fyrir skeið. Matthías Leó mætir með Hafstein frá Vakursstöðum en hann höfum við séð áður undir handleiðslu Teits Árnasonar en Hafsteinn hefur hlotið 9.5 fyrir skeið í kynbótadómi. Árni Björn Pálsson mætir með tíu skeiðarann Roða frá Lyngholti og Olil Amble mætir með engan annan en Álfarinn frá Syðri-Gegnishólum sem hlaut 9.5 fyrir skeið í kynbótadómi. Sigurbjörn Bárðason mætir með Nóa frá Stóra-Hofi en hann hefur einnig hlotið 9.5 fyrir skeið. Sigurvegari fimmgangsins frá því í fyrra Hulda Gústafsdóttir teflir nú fram Gangster frá Árgerði en Gangster vakti mikla athygli í A flokki á LM2014 á Hellu. Íslandsmeistarinn í fimmgangi Þórarinn Ragnarsson mætir með Hilding frá Bergi en þeir voru í A úrslitum í þessari grein í fyrra. 

Ekki láta þessa veislu framhjá ykkur fara og tryggið ykkur miða inn á tix.is en einnig verða seldir miðar í anddyri. Einnig er hægt að horfa beint frá keppninni inn á oz.com og á Stöð 2 sport.