Ráslisti fyrir fimmganginn

Næst á dagskrá er fimmgangur en keppni hefst kl. 19:00 og verður hún haldin í Samskipahöllinni í Spretti í Kópavogi. Fyrstur í braut er John Kristinn Sigurjónsson á Snævari Þór frá Eystra-Fróðholti en þeir keppa fyrir lið Heimahaga. Ísólfur Líndal sigraði þessa grein í fyrra á Sólbjarti frá Flekkudal en þeir mæta aftur í ár og gaman verður að sjá hvort þeir verja titilinn. Einungis einu sinni áður hefur sama parið unnið fimmganginn tvö ár í röð en það voru þau Hulda Gústafsdóttir og Galdur frá Flagbjarnarholti árin 2008 og 2007. 

Næstum allir hestarnir sem voru í A úrslitum í fyrra mæta aftur í ár nema Reynir Örn Pálmason og Sigurbjörn Bárðarson mæta með nýja hesta. Reynir mætir með Laxnes frá Lambanesi og Sigurbjörn með Nagla frá Flagbjarnarholti. 

Það styttist í annan endan hjá okkur í Meistaradeildinni en þetta er næst síðasta mótið, síðasta mótið verður haldið 8. apríl og þá verður keppt í tölti og skeiði gegnum höllina. 

Hart er barist í liða og einstaklingskeppninni en efstur þar er Árni Björn Pálsson með 41,5 stig og annar er Jakob S. Sigurðsson með 32,0 stig. Árni Björn mætir með Odd frá Breiðholti en þeir voru í úrslitum í fyrra og hafa verið að gera það gott í fimmgangskeppnum undanfarin ár þannig að hér er á ferðinni reynslu mikið par. Jakob S. Sigurðsson mætir hins vegar með Auðlind frá Brúnum en Auðlind er einungis 6 vetra og því heldur óreynd á keppnisvellinum. Gaman verður að sjá hvað Jakob og Auðlind eiga eftir að gera annað kvöld. 

Ráslisti: