Kveikur mætir

Það stefnir allt í stærstu hestaveislu ársins í Fákaseli, fimmtudagskvöldið, 4.apríl en á ráslistanum eru engar smá bombur. Aðalheiður Anna ætlar ekki að gefa neitt eftir í einstaklingskeppninni og mætir með hæst dæmda klárhest í heimi og stjörnu síðasta Landsmóts, Kveik frá Stangarlæk. Þetta er frumraun Kveiks í keppni en hann hefur m.a. hlotið 10 fyrir tölt og vilja og geðslag. Aðalheiður er sem stendur í öðru sæti í einstaklingskeppninni en einungis 3,5 stigi skilja að hana og Jakob S. Sigurðsson en hann vann þessa grein í fyrra á Júlíu frá Hamarsey og ætla þau sér eflaust að leika sama leikinn í ár. Árni Björn Pálsson mætir með glæsihryssuna Hátíð frá Hemlu II en hún hefur vakið mikla athygli fyrir föngulega framkomu. Ekki nóg með það að þá eru villikettir skráðir til leiks bæði í töltinu og flugskeiðinu þá er einnig í fyrsta sinn einhverjir eldhugar á ferð sem telja sig eiga erindi við þá bestu og eru þeir búnir að kaupa sig inn í keppnina í bæði tölti og skeiði. Það verður æsispennandi að sjá hvernig leikar fara en það er alveg öruggt að það stefnir í hörku keppni sem enginn sannur hestarmaður lætur framhjá sér fara.

Húsið verður opnað kl 17:00 en boðið verður upp á hlaðborð á undan með lambalæri og smjörsprautaðri kalkúnabringu ásamt dýrindis meðlæti á aðeins 2.900 kr. Við mælum með að fólk tryggi sér miða á tix.is en einnig verður hægt að horfa á keppnina í beinni á RÚV2.