Árni Björn, Jakob og Konráð sigurvegarar kvöldsins

Lokakvöld Meistaradeildar Cintmani í hestaíþróttum fór fram í gær í Víðidalnum í Reykjavík. Mikil spenna ríkti fyrir kvöldinu þar sem einungis örfá stig skildu á milli liða og knapa í einstaklings- og liðakeppninni.

Kvöldið hófst á forkeppni í tölti þar sem glæsilegustu töltarar landsins öttu kappi saman. Eftir forkeppni stóð Jakob Svavar Sigurðsson efstur á Júlíu frá Hamarsey. Mikið var í húfi hjá Jakobi en fyrir kvöldið leiddi hann einstaklingskeppnina og mátti líti út af bregða þar sem Árni Björn Pálsson fylgdi honum fast eftir með einungis 1,5 stig minna. Árni Björn nældi sér einnig í sæti í úrslitunum í tölti en hann varð fjórði inn í úrslit á Ljúf frá Torfunesi. Úrslitin voru glæsileg og var mikil stemming í húsinu. Þau fóru þannig að Jakob tryggði sér efsta sætið með 8,78 í einkunn en annar varð Árni Björn með 8,56 í einkunn. Í þriðja sæti var svo Viðar Ingólfsson á Pixi frá Mið-Fossum með 8,17 í einkunn.

Þetta þýddi einungis eitt að úrslitin í einstaklingskeppninni myndu ráðast í skeiðinu. Eftir fyrri sprett lá hvorugur hesturinn hjá Árna eða Jakobi þannig að það var allt undir í seinni sprettinum. Árni var fyrr í rásröð og hryssa hann Skykkja frá Breiðholti í Flóa fór á fljúgandi siglingu á skeiði í gegnum húsið og hlutu þau tímann 4.88 sek, þriðja besta tíma kvöldsins, það mátti heyra saumnál detta þegar beðið var eftir að Jakob kæmi í gegnum höllina á Straumi frá Skrúð en Straumur vildi ekki skeiða þetta kvöldið, tíminn enginn og því sigurinn í einstaklingskeppninni í höfn hjá Árna Birni, fjórða árið sem hann sigrar hana en hann sigraði einnig árið 2014, 2015 og 2016. Annar í einstaklingskeppninni var Jakob og þriðji Viðar Ingólfsson. Sigurvegari flugskeiðsins var hins vegar Konráð Valur Sveinsson á Kjarki frá Árbæjarhjáleigu II með tímann 4,73 sek. en Konráð og Kjarkur eru búnir að standa í fremstu röð í skeiðkappreiðum síðustu árin. Annar var Guðmundur Björgvinsson á Íslandsmetshafanum Glúmi frá Þóroddsstöðum með tímann 4,75 sek.

Liðakeppnina sigraði lið Líflands með 350 stig en liðsmenn voru þeir Jakob, Guðmundur, Davíð Jónsson, John Kristinn Sigurjónsson og Sigursteinn Sumarliðason. Rétt á eftir þeim var lið Hrímnis / Export hesta með 345 stig og í því þriðja var lið Top Reiter með 326 stig.

Niðurstöður kvöldsins