Jakob sigrar aftur !

Keppni í slaktaumatölti fór fram í kvöld en mikil spenna var hvort að ríkjandi Íslandsmeistarar í þessari grein, Jakob Svavar Siguðrsson og Júlía frá Hamarsey myndu sigra en þau tryggðu sér strax örugga forystu í forkeppni. Í úrslitum veittu þau Viðar Ingólfsson og Pixi frá Mið-Fossum þeim verðuga keppni en eftir hæga töltið leiddu þau Viðar og Pixi með 9,0 í einkunn. Jakob og Júlía fylgdu þeim þar á eftir með 8,50 í einkunn. Eftir hæga töltið var ljóst að Jakob og Viðar væru jafnir og því myndu úrslitin ráðast á slaka taumnum en það atriði vegur tvöfalt. Það fór svo að Jakob Svavar varð langefstur fyrir slaka tauminn með 8,83 í einkunn sem að tryggði honum sigurinn. Lokaeinkunn 8.67 en í öðru sæti varð Viðar Ingólfsson með 8.33 í einkunn og í því þriðja var Teitur Árnason með 7.87 í einkunn. Það var lið Top Reiter sem hreppti liða plattann að þessu sinni.

Eftir tvær greinar er það Jakob Svavar sem leiðir einstaklingskeppnina með 24 stig eftir sigur í báðum greinum, slaktaumatölti og fjórgangi. Á eftir honum eru þau jöfn Árni Björn Pálsson og Elin Holst með 14,5 stig.  Lið Top Reiter leiðir liðakeppnina með 101,5 stig en eftir því er Gagnmyllan með 86 stig. Næsta grein verður 1 mars og er þá keppt í fimmgangi í Samskipahöllinni.

Niðurstöður