Hörkuhestar á ráslistanum fyrir gæðingafimina

Það stefnir allt í hörku keppni í gæðingafiminni sem fer fram nú á fimmtudaginn 14.mars í TM höllinni í Víðidal í Reykjavík.  Jóhanna Margrét Snorradóttir er fyrst í braut en hún keppir á hestinum Kára frá Ásbrú fyrir hönd Hestvits/Árbakka/Sumarliðabæ.

Það var Árni Björn Pálsson sem sigraði þessa grein í fyrra á Flaumi frá Sólvangi en þeir félagar eru skráðir aftur til leiks. Jakob Svavar Sigurðsson er efstur í einstaklingskeppninni enn hann mætir með Konsert frá Hofi en eflaust margir eru spenntir að sjá hann í þessari grein. Aðalheiður Anna og Óskar frá Breiðsstöðum voru þriðju í þessari grein í fyrra og ætla sér eflaust að gera góða hluti á fimmtudaginn en hún er í öðru sæti í einstaklingskeppninni.

Það var mikið um villiketti í þessari grein í fyrra en ekkert er um þá í ár. Mjótt er á munum í liðakeppninni og verður spennandi að sjá hver niðurstaðan verður eftir gæðingafimina en enginn mun gefa tommu eftir.

Húsið opnar kl. 17:00 en eins og áður verður næg dagskrá þangað til keppni hefst. Dýrindis veitingar verða í boði, lambafil, kalkún, ferskt salat, rótargrænmeti, bearnaise og sveppasósa. Steinar Sigurbjörnsson mun síðan verða með afar áhugaverðan fyrirlestur í matsalnum kl 17:45. Um að gera að mæta tímanlega!  Keppni hefst síðan á slaginu 19:00

Miðasala er í fullum gangi inn á tix.is en einnig verður hægt að horfa á deildina í beinni á RÚV2. Næstu mót eru síðan skeiðmótið þann 23.mars og lokamótið 4.apríl að Fákaseli, Ingólfshvoli.

Ráslisti - Gæðingafimi