Ráslisti fyrir gæðingafimina

Keppt verður í gæðingafimi á fimmtudaginn en keppni hefst kl. 19:00 í TM höllinni í Víðidal í Reykjavík. Sigurbjörn Bárðarson og Nagli frá Flagbjarnarholti eru fyrstir í braut en á eftir þeim kemur svokallaður villiköttur en hann er í liði Gangmyllunnar. Hvert lið getur, á hverju tímabili, fengið svokallaðan villikött til að keppa fyrir sitt lið en villikötturinn er knapi sem er ekki skráður í deildina. Það eru fjórir villikettir í gæðingafiminni en lið Gangmyllunar, Líflands, Ganghesta/Margrétarhof/Equitec og Árbakka/Hestvits/Sumarliðabæ eru öll að notafæra sér þetta tækifæri. 

Margir spennandi hestar eru á ráslistanum þ.á.m. Landsmóts sigurvegarinn Nökkvi frá Syðra-Skörðugili en Jakob S. Sigurðsson mætir með hann. Hans Þór Hilmarsson mætir með hestagullið Söru frá Stóra-Vatnsskarði en hún hefur alltaf vakið mikla athygli þar sem hún mætir. Teitur Árnason mætir með Reyni frá Flugumýri en þeir Reynir og Sigurður Rúnar Pálsson hafa átt góðu gengi að fagna í töltkeppni. 

Við hvetjum alla til að mæta í höllina og horfa á þessa gæðinga leika listir sínar. Húsið opnar kl. 17:00 en boðið verður upp á gúllassúpu og brauð áður en mótið byrjar. Miðasala fer fram á tix.is en einnig í anddyri hallarinnar. Einnig er hægt að horfa á deildina beint á oz.com og Stöð 2 Sport.